داود چێش به‌ ده‌وروبه‌ریش ماچۆ- چیرۆکه‌- غالب  هه‌ورامی
داود چێش به‌ ده‌وروبه‌ریش ماچۆ- چیرۆکه‌- غالب هه‌ورامی
 

1038جارێ وانیانۆ
0
داود چێش به‌ ده‌وروبه‌ریش ماچۆ- چیرۆکه‌- غالب هه‌ورامی
هه‌میشه‌ سیاو وینا و گردو خوێشه‌کاش و ڕه‌فیقاش لۆمه‌ش که‌را ،،
Friday, 13 January 2012 08:27
کۆدی تایبه‌تی‌: 651

 

ماچا : داود تۆ هیچ همێدێت پی دنیێ و پی ژیانیه‌ نیا ..

ئایچ گۆش مه‌دۆ په‌نه‌ پێسه‌ گردو جارا گنۆ سه‌رزه‌نشت و خه‌ڵکی و گردو خوێشه‌کاش

چه‌نی داود جگه‌ره‌که‌ش گیسنانه‌ و نه‌فه‌سێ قوڵه‌ش داوه‌نه‌ و واتش:

گه‌ر ئه‌فلاتون زینده‌ بۆوه‌ قه‌ناعه‌تم په‌نه‌ مه‌که‌رۆ که‌ ئی خه‌ڵکه‌ خه‌ڵکێ فره‌ گیرۆده‌و سه‌روه‌نه‌شێویان ، کابرا یه‌ری ده‌سێ یانێش هه‌نێ هه‌ڵپه‌و چواره‌میشا و 5 دۆنمێ زه‌مینش هه‌ن خه‌ریکو ئه‌رزو حاڵیا په‌ی دۆنمێ ته‌ری،

وێره‌گا هه‌ر یۆ جه‌ شمه‌ (خوێشه‌کێش) سه‌رو سفره‌یتا ئه‌جو لۆقه‌نته‌و ئه‌وساو قه‌نده‌هارین هه‌مه‌ نۆع وارده‌ش ئینا سه‌رۆ ویرتا لا هامساکه‌یتاوه‌ نیا که‌ نانو چایچش ده‌س مه‌گنۆ....

یۆ جه‌ خوێشه‌کاش ئاماوه‌ قسێ ( داود تۆ گه‌ره‌کتا پێسه‌ سه‌رده‌م و ته‌وه‌نی –عصرالحجر- ی زینده‌گی که‌رمێ و به‌ ته‌وه‌نی ئێر که‌رمێ ، تفو دۆ وه‌رمێ ساعب و وێره‌گا ،،،،

نا تۆ جنێت لوێنینه‌ !!! ده‌ورو په‌شتش داشا قاقاو خوه‌ی......

داود لوا سه‌رو دیمه‌که‌ تفینه‌که‌و پاڵو چایخانه‌که‌ینه‌ نیشته‌ره‌،

ماچۆ: من جنێم نه‌لێنینه‌ ، وه‌لێم شمه‌ گرفتارێ بێندێ و خه‌ریکا به‌حرو غرورینه‌ غه‌رقێ بیدێ کام جه‌ شمه‌ پێسه‌ ئینسانی ژیۆ ته‌نیا وه‌ردێ و موسدێ ، کامتا یه‌ک فلسێسور وارداتتا په‌ی ئی کۆمه‌ڵگه‌یه‌ هه‌ن باخه‌کێتا وشکێ بێنێ شمه‌ به‌وێتا مه‌زاندێ که‌لتورتا جه‌ ده‌س دان ته‌نانه‌ت لیباس و وارده‌که‌یچتا فاڕانتا، چی مه‌مله‌که‌تو ئێمه‌نه‌ یاگی ئه‌سه‌فین که‌ ماسو دۆیچتا به‌رو وه‌ڵاتیۆ په‌ی مێ ..

گه‌ر پیا قه‌دیمیه‌کا زیندێ که‌ریۆ ئانا حاشاتا چه‌نه‌ که‌را ، کۆن ساوه‌رو ئاشو لالۆ حه‌مه‌ی کۆنی گه‌نمه‌ کۆێکی مه‌تی نازارێ،کوته‌ و له‌پۆرته‌ و له‌مه‌زه‌ڕینێ !!!!

وازتا جه‌ زینده‌گیه‌ سونه‌تیه‌که‌یتا ئارد ، باوشیتا که‌ردێنۆ په‌ی دنێ ئه‌جوتا مه‌مردێ واته‌نشا قه‌دیمیا تا به‌لو فره‌ بۆ سمۆره‌ هه‌ر ئاوراشا ، ئای لالۆ مه‌جیدی ڕه‌حمه‌تی کۆنی مامۆ عه‌ودڵڵا چکۆ باروتا و ویندێ بزاندێ چ باسا جه‌ مه‌مله‌که‌ته‌که‌و شمه‌نه‌ ، یاگێ شابازا کۆرکۆرێ وازا.

چی گێره‌و کێشه‌نه‌ بێنێ ، فه‌راد ئاما و ماچۆ ئانه‌ سه‌وای با بلمدێ ئه‌رزو حاڵ ده‌یمێ که‌-کوتی کیمیایی- وه‌رگێرمێ په‌ی باخو کشتو کیاره‌که‌یما ،،

داود ماچۆ: چی شمه‌ کشتو کیارتا هه‌ن تا کوتش په‌ی هۆر گێردێ ؟؟

فه‌راد ماچۆ: داود گیان زانمێ نیاما ، به‌رمێش بازار وره‌ش مێش !!! هاهاها ده‌ورو په‌شته‌که‌یچش قا قا خوێ..

داود ماچۆ : یه‌کجار بازاره‌نه‌ ئیمانه‌که‌یچتا وره‌شدێ و ئیتر مه‌لدێ وه‌رۆ سه‌فی ئه‌وه‌ڵ و ده‌سێ داردێ خوای ، ئننه‌ ماڵی حه‌رامتا وارده‌ن پێسه‌ شوتی گێڵێندێ ،،

پا گردو سه‌روه‌تیچتاوه‌ هیشتای په‌ی هه‌ری تۆپای گێڵدێ ناڵێش پۆ که‌ندێ!!

داود نه‌یاوابێ نیهایه‌تو قسه‌کێش ناجی ئه‌فه‌ندیێ جه‌ ئۆروپاوه‌ دوه‌ساڵێ چێوه‌ڵته‌ر گێڵابێ به‌ڵام نزیکه‌و 6 مانگێ لوابێ پایته‌خت یانێ بسانو ...

وێش که‌رد دلێ جه‌مه‌و خه‌ڵکیره‌و سڵامش دا ( جه‌ماعه‌ت و ڕه‌حمه‌ت) گردی خێر ئامای که‌رد ، دمای ئانه‌یه 5 کڵوێ قه‌ندش وارد به‌ چایه‌که‌شۆ ، ماچۆ: ئه‌جۆ قه‌نده‌که‌یچتا خارجین؟

فره‌ فشاو زووتاویۆوه‌ . ئه‌ی ماتودێ تفی بێ پێشێ چایۆ وه‌ردێ ؟؟

داود ماچۆ: ته‌نیا هاناوه‌کێما وێمانێنێ ، ئانا ئیسه‌ ئاویچ که‌را دلێ ده‌باو په‌نه‌ما وره‌شا ئیسه‌ تفی چایۆ وه‌را..

ئا ده‌ورو په‌شته‌ داودش چه‌نه‌ ژیوێ فره‌ ویرکه‌رده‌یۆشا جیابێ فره‌ په‌رسێ بێنێ و ته‌نانه‌ت دوێنێ سه‌رو گولانه‌ته‌رین به‌شه‌و ژیوای خه‌ڵکی ...

گه‌ر که‌سێ فره‌ مه‌رحه‌بایش گه‌رمو گوڕ بیێ په‌نه‌ش واچێنێ ئی پیا فره‌ ماساوچین و فره‌ ملۆ شانو باڵو خه‌ڵکیره‌ گه‌رکه‌سێچ،مه‌رحه‌بایش هاکه‌زایی بیێ واچێنێش په‌نه‌ که‌سێ فره‌ لوت به‌رزو عنوان زلا ...

ئینه‌ به‌ هه‌رحاڵ خۆ که‌سیچ فه‌قیر بیێ دلێشانه‌ جیای ئانه‌یه‌ ده‌س گرۆیش که‌را واچێنه‌ ئینه‌ هه‌ر سه‌گبابه‌و سه‌ره‌سواڵکه‌ر بیه‌ن ، یا ئاگه‌ر که‌سێ ته‌مام دۆڵه‌مه‌ند بیێ واچێنێ ئینه‌ چکۆش مارۆ ئی گردو زه‌ڕیه‌ ؟

خۆ وێچشا خواشا چه‌نه‌ ڕازی بۆ شه‌وێنه‌ به‌ هه‌سه‌رێ خه‌ریکی ئۆدیم که‌رده‌ی بارا بێنێ و ڕۆیچه‌نه‌ پی ده‌سو پۆ ده‌س هه‌ڵپه‌و زه‌ڕیشا بێ ،، داودیچ زو زو واچی : مه‌ر خاک ده‌مشا په‌ڕ که‌رۆ...

 

-غالب هه‌ورامی-2012

Share/Save/Bookmark